साध्वी पछिल्लो डेढ दशकदेखि भारतको  मुम्बईमा बसेर भारतीय चलचित्रमा लेखन, निर्देशन र अभिनेतृको मुख्य भूमिकामा काम गर्दै आउनुभएको छ । हिन्दी चलचित्र ‘द ड्रिम’ मा मुख्य अभिनेतृको भूमिकापछि उहाँ बलिउडमा चर्चित हुनुहुन्छ । मन्दिरको दर्शन र पूजापाठका लागि नेता, कलाकारलगायतका राष्ट्रसेवक कर्मचारी दसैँका बेला जन्मथलो सम्झिँदै गाउँ फर्किने व्रmम जारी छ । नेता र कलाकारले जिल्लाका प्रसिद्ध मन्दिरको दर्शनअघि जन्मघरको दैलोमा पुगेर परिवारसहित तस्बिर खिच्दा पुर्खाले बनाएको घरको दैलो मुस्कुराएको छ ।

पूर्वमन्त्रीसमेत रहनुभएका नेता रमेश लेखक धर्मपत्नी यशोदा लेखक र छोरा चिरायु लेखकसहित छ वर्षपछि बिहीबार आफ्नो थातथलो बैतडीको दशरथचन्द नगरपालिका–५, आइतगाउँ पुग्नुभएको हो । दशरथचन्द नगरपालिका–५, देशका विज्ञ जन्माउने गाउँ हो । नेता लेखकले जन्मघरको दैलोमा पुग्दा बाल्यकालको सम्झना आएको अनुभूति सुनाएको उहाँका स्वकीय सचिव जनकराज भट्टले बताउनुभयो । जीर्ण घरलाई छिट्टै पुनर्निर्माण गर्ने नेता लेखकले बताउनुभएको छ । नेता लेखकले दशरथचन्द नगरपालिका–५, बैतडीको यही जन्मघरबाट कक्षा ६ सम्मको शिक्षा आर्जन गर्नुभएको थियो ।

नेता लेखको जस्तै दशरथचन्द नगरपालिका–५ मा अमर सहिद दशरथचन्द, प्राध्यापक, डाक्टर, इन्जिनियर र नेपालको प्रशासनका ज्ञाता र राजदूत जस्ता विज्ञ व्यक्तित्व जन्माउने गाउँ भए पनि यहाँका अधिकांश घर अहिले जीर्ण अवस्थामा छन् । नेपालको विकास प्रशासनका ज्ञाता मानिनु हुने डा. भीमदेव भट्ट, वरिष्ठ मुटुरोग विशेषज्ञ डा. यादव भट्ट, किड्नीरोग विशेषज्ञ डा. अर्जुनदेज भट्ट, त्रिभुवन विश्वविद्यालयमा ३२ वर्ष अङ्ग्रेजी पढाउनुहुने प्राध्यापक आनन्ददेव भट्ट, राष्ट्रिय अनुसन्धानका निवर्तमान प्रमुख अशोकदेव भट्टलगायतका घर जीर्ण अवस्थामा छन् ।

सुदूरपश्चिमका मौलिक घरका रूपमा रहेका परम्परागत खोलदेली (बुट्टा कुँदिएका मूलढोका) भएका घर बिरलै देख्न सकिन्छ । स्थानीय कलाकर्मीले काठ र सुर्कीको प्रयोग गरी घर निर्माण गर्ने चलन अहिले हराइसकेको छ । रोजगारी र काम विशेषले जिल्ला र देशबाहिर रहेका मानिसले अरू बेला  जन्मथलो नआए पनि दसैँमा अधिकांश व्यक्ति थातथलो सम्झँदै गाउँ फर्किने गरेको दशरथचन्द नगरपालिका–५ का पूर्णानन्द लेखकले बताउनुभयो ।

बसाइँसराइ र अवसरको खोजीका कारण बैतडी जिल्लाको जनसङ्ख्या हरेक वर्ष घट्दै गएको छ । विसं २०६८ मा बैतडीको जनसङ्ख्या  दुई लाख ५८ हजार रहेकोमा २०७८ सालको जनगणना अनुसार यहाँको जनसङ्ख्या घटेर दुई लाख ४४ हजारमा झरेको छ ।