धनगढी,२४ माघ – नेपाली सेनाले हरेक वर्ष महाशिवरात्रिका दिन सेना दिवस मनाउँदै आएको छ । यस वर्षको सेना दिवस–२०८० का अवसरमा सुदूरपश्चिम पृतना हेड क्वाटरले महाशिवरात्रि तथा नेपाली सेना स्थापनाको २६१ औँ वार्षिक उत्सवको अवसरमा धनगढी स्थित कवर्ड हलको खेल मैदानमा विविध सैनिक प्रदर्शनी तथा दौड प्रतियोगिता सञ्चालन गर्ने भएको छ । धनगढी रङ्गशालामा फागुन २६ गते देखी २८ गते सम्म विभिन्न क्रियाकलाप सञ्चालन गरिने बताइएको छ ।
सैनिक विविध प्रदर्शनीको दौरानमा नेपाली सेनाको युद्धक, युद्ध मद्दती तथा युद्ध सेवा मद्दती युनिटहरूको भूमिका तथा विभिन्न हातहतियार, ईक्युप्मेन्ट, पोसाक, सामाग्री, युद्धकला झल्कने झलक सम्बन्धी वास्तविक प्रदर्शनीको साथै नेपाली सेनाद्वारा गरिएका विविध गतिविधिहरू (प्रकृति संरक्षण, विकास निर्माण, जनहितका कार्य, विश्व शान्ति स्थापना, खेलकुद आदीलाई फोटो तथा भिडियो मार्फत जानकारी गराइने कार्यक्रम रहेको छ ।
फाल्गुण २८ गते बिहान ७ बजेबाट सुरु हुने“युनिटी रन २०८०”का विभिन्न विधाहरूमा उमेर समूह अनुसार ५ किलोमिटर दौडमा माध्यमिक तथा उच्च माध्यमिक विद्यालयका छात्र–छात्राहरूबाट प्रथम हुनेलाई दश हजार,द्धितिय हुनेलाई सात हजार र तृतीय हुनलाई पाँच हजार छुट्टा–छुट्टै पुरस्कार प्रदान गरिने छ ।
यस्तै १८ वर्ष माथिका पुरुष तथा महिलाहरूलाई खुल्ला १० किलोमिटर दौडमा प्रथम हुनेलाई पन्ध्र हजार द्धितित हुनेलाई दश हजार र तृतीय हुनेलाई सात हजार छुट्टा–छुट्टै पुरस्कार प्रदान गरिने बताइएको छ ।
प्रथम हुने महिला र पुरुषलाई माउण्टेन बाइकको समेत पुरस्कारको व्यवस्था गरिएको सुदूरपश्चिम पृतना हेड क्वाटरले जनाएको छ ।
सुदूरपश्चिम पृतना हेड क्वाटरको संयोजकत्वमा सुरु हुने कार्यक्रममा सुदूरपश्चिम प्रदेशमा तैनाथ नेपाली सेनाका सम्पूर्ण युनिटहरूको सहभागिता रहनेछ ।
