धनगढी-कोरोना भाइरसको दोस्रो लहर आएपछि धनगढी कोरोनाको ‘हटस्पट’को बनेको छ। स्थानीय प्रशासनले निषेधाज्ञा जारी गरे पनि संक्रमण दरमा भने कमी आएको छैन। कुल एक लाख ८६ हजार २५० जनसंख्या रहेको धनगढी उपमहानगरपालिकामा दोस्रो लहर भित्रिएपछि चैतदेखि हालसम्म मात्र संक्रमितको संख्या २ हजार ८१५ पुगेको छ। पहिलो लहरका बेला करिब एक वर्षको अवधिमा तीन हजार ७०० जना संक्रमित फेला परेका थिए।

उपमहानगरपालिकाको स्वास्थ्य शाखाका जनस्वास्थ्य निरीक्षक लक्ष्मीराज उपाध्यायका अनुसार पछिल्लोपटक संक्रमित भएकामध्ये एक हजार ३९० जना कोरोनामुक्त भएका छन्। एक हजार ३७७ जना सक्रिय संक्रमित छन्। गत वर्ष कोरोना संक्रमणबाट १९ जनाको मृत्यु भएकोमा यस वर्षको करिब डेढ महिनामा झण्डै तीन गुणा बढी ५५ जनाको मृत्यु भएको उपाध्यायले जानकारी दिए।

बजार क्षेत्रमा बढी संक्रमण

धनगढी उपहानगरपालिकाको बजार क्षेत्रमा पर्ने वडाहरुमा संक्रमण र मृत्यु दर धेरै रहेको छ। स्वास्थ्य शाखाका अनुसार वडा नम्बर ५ मा सबैभन्दा धेरै ७२७ जना संक्रमित रहेका छन्। यस्तै, बजार क्षेत्र नै पर्ने वडा नम्बर १ मा ३८८, वडा नम्बर २ मा ३७३, वडा नम्बर ३ र ४ मा ३४३÷३४३ जना संक्रमित रहेका छन्।

दोस्रो लहरको संक्रमणका कारण ५५ जनाको मृत्यु भइसकेको छ। जसमध्ये वडा नम्बर ३ का १४, वडा नम्बर २ का ८, वडा नम्बर ४ र ५ का ६÷६ जनाको रहेका छन्। बजार क्षेत्रमा संक्रमण र मृत्यु दर बढी हुनुको प्रमुख कारण विभिन्न बहानामा हुने आवतजावत नै भएको अधिकारीहरु बताउँछन्।

भारतबाट आउनेहरुलाई व्यवस्थापन गर्न नसक्नु कमजोरी

धनगढी उपमहानगरपालिकाका स्वास्थ्य शाखाका जनस्वास्थ्य निरीक्षक लक्ष्मीराज उपाध्याय भारतबाट आउनेहरुलाई उचित व्यवस्थापन गर्न नसक्नु महामारी फैलिनुमा ठूलो कमजोरी भएको स्वीकार्छन्।

‘उहाँहरु निर्वाध रुपमा बजारमा किनमेल गर्ने, एकअर्कालाई भेट्न थाल्नुभयो। त्यसैले संक्रमण तीव्र बन्यो,’ उनले भने, ‘अर्को कुरा धनगढी प्रदेशको राजधानी भएकाले यहाँ मानिसको आवतजावत बढी हुने हुँदा संक्रमण फैलियो।’

वैशाख महिनाभर भएका विवाह, ब्रतबन्ध, पूजापाठका कारण पनि धनगढीमा संक्रमण बढी फैलिएको उपाध्ययको अनुमान छ।

निषेधाज्ञा खुकुलो हुँदाको परिणाम

कोरोना भाइरसको चेन ब्रेक गर्न भनेर कैलालीमा स्थानीय प्रशासनले तीन सातादेखि निषेधाज्ञा जारी गरेको छ। निषेधाज्ञा लागू गरे पनि सुरुका केही दिन खाद्य वस्तुका पसलहरु बिहानको समयमा सञ्चालन भए। उक्त समयमा किनमेलका लागि पुग्ने मानिसहरुको बजार क्षेत्रमा भिडभाड लाग्ने गरेको थियो। अहिले सातामा तीन दिन बिहानको समयमा अत्यावश्यक सेवाका पसल व्यवसाय खोल्न दिइएको छ। जसका कारण भिडभाड नियन्त्रण हुन सकेको छैन।

मानिसहरु किनमेलको बहानामा एकअर्काको सम्पर्कमा जाने क्रम बढेकाले संक्रमण पनि फैलिरहेको चिकित्सकले बताउँदै आएका छन्। तर, स्थानीय प्रशासनले भने निषेधाज्ञालाई कडाइका साथ लागू गरेको दाबी गरिरहेको छ।