कञ्चनपुरको भीमदत्त नगरपालिकाले कोरोना भाइरस विरुद्धको खोप खरिद गर्न अनुमति माग गर्दै स्वास्थ्य तथा जनसंख्या मन्त्रालयलाई पत्र पठाएको छ । अहिलेको अवस्थामा जनताको स्वास्थ्य सुरक्षा नै प्रमुख रहेको भन्दै मन्त्रालयसँग खोप किन्ने अनुमति माग गर्दै पत्र पठाएको हो ।

नगरप्रमुख सुरेन्द्र विष्टले मन्त्रालयले अनुमति दिएको खण्डमा नगरपालिकाले खोप किन्न तयार रहेको बताए । विष्ट भन्छन्, ‘जसरी पनि नगरवासीको स्वास्थ्य सुरक्षा गर्नुपर्छ । हामीले सरकारले उपलब्ध गराउने खोप पनि माग गरेका छौँ । त्यो बाहेक आफ्नै खर्चमा हामी किनेर नगरवासीलाई खोप दिन्छौँ । त्यसका लागि मन्त्रालयले अनुमति दिनुपर्छ ।’

यसै गरी कञ्चनपुरकै बेलौरी नगरपालिकाले खोप खरिदको अनुमति माग गर्दै मन्त्रालयमा पत्र पठाएको छ । खोप खरिद गर्न नगरपालिका सक्षम रहेको भन्दै त्यसको अनुमति माग गरिएको नगरप्रमुख पोतिलाल चौधरीले जनाए ।

बेलौरी नगरपालिकाले खोप खरिद गरी नगरपालिकासम्म ढुवानी गर्नका लागि अनुमति तथा सहजीकरण गरिदिन आग्रह गर्दै मन्त्रालयमा पत्र पठाएको हो ।

कैलालीको धनगढी उपमहानगरपालिकाले पनि खोप खरिदका लागि अनुमति मागेको छ । नगरप्रमुख नृप बहादुर बडले नगरवासीबाट खोपको अत्यधिक माग भइरहेको भन्दै सरकारले उपलब्ध गराएको खोपले थोरैलाई मात्र व्यवस्था भइरहेको बताए । खोप किनेर नगरवासीलाई लगाउन सक्षम रहेको भन्दै त्यसका लागि मन्त्रालयसँग अनुमति माग गरिएको उनको भनाइ छ ।

यस्तै गरी काभ्रेपलाञ्चोक स्थित पाँचखाल नगरपालिका पनि खोप खरिद अनुमति माग गर्दै मन्त्रालयमा पत्राचार गरेको छ । नगरपालिकाले आफ्ना नागरिकका लागि ४० हजार डोज खोप आफै खरिद गर्ने जनाउँदै मन्त्रालयसँग खरिद अनुमति माग गरेको हो ।

नगरमा १८ वर्षमाथिका करिब २० हजार नागरिक रहेको भन्दै उनीहरूलाई दुई डोज खोप दिनका लागि ४० हजार डोज खोप खरिद अनुमति माग गरिएको नगर प्रमुख महेश खरेलले बताए । मन्त्रालयले अनुमति दिएको खण्डमा प्रक्रिया थालेर चाँडै नगरवासीलाई खोप लगाउने योजना नगरपालिकाको छ । नागरिकलाई बचाउन विकास बजेट कटौती गरेर भएपनि खोप किन्नैपर्ने आवश्यक रहेको उनले जानकारी दिए ।

आफ्नै खर्चमा खोप खरिद गर्ने अभियानमा पाल्पाको रामपुर नगरपालिका पनि लागि परेको छ । आफ्नै खर्चमा खोप खरिद गर्ने भन्दै त्यसका लागि मन्त्रालयसँग अनुमति माग गरेको छ । नगर प्रमुख रमणबहादुर थापाले स्वास्थ्य तथा जनसंख्यामन्त्री हृदयेश त्रिपाठीलाई भेटेरै खोप खरिद गर्ने अनुमति दिन अनुरोध गरेका थिए ।
यस्तै स्याङ्जाको वालिङ नगरपालिकाले पनि खोप खरिदको अनुमति माग गर्दै मन्त्रालयमा पत्र पठाएको छ । आफ्ना नगरवासीलाई खोप खरिद गरेर लगाउन नगरपालिका सक्षम रहेको भन्दै त्यसका लागि लागी मन्त्रालयसँग अनुमति माग गरिएको हो ।

सरकारले नै खोप ल्याउन नसकिरहेका बेला स्थानीय तह भने खोप खरिदको अनुमति माग गर्दै धमाधम स्वास्थ्य मन्त्रालयलाई पत्र पठाउन थालेका छन् । स्थानीय तहले आफै खोप खरिद गर्ने विषयमा मन्त्रालय भने सकारात्मक देखिएको छ ।

के भन्छन् मन्त्रालयका प्रवक्ता ?

मन्त्रालयका प्रवक्ता डा, कृष्णप्रसाद पौडेलले स्थानीय तहलाई खोप खरिद अनुमति दिने विषयमा सकारात्मक रहेको बताए । संघीय सरकारले पनि खोप ल्याउन नसकिरहेका बेला स्थानीय तहले खोप ल्याउन सक्छ भन्नेमा शंका रहेको उनी बताउँछन् ।

पौडेल भन्छन्, ‘सरकारले राष्ट्रपति स्तरबाट समेत पहल गरिरहेको छ । तर विश्वभर नै अभाव भएका कारण ल्याउन सकिरहेको छैन । यस्तो अवस्थामा स्थानीय तहले खोप ल्याउन सक्छ भन्नेमा पूर्ण विश्वस्त हुन सकिँदैन ।’

खोप खरिदका लागि निजी क्षेत्रलाई पनि अनुमति दिएको भन्दै उनीहरूले पनि अहिलेसम्म ल्याउन नसकेको बताए । ‘हाम्रो अहिलेको प्राथमिकता भनेको जसरी पनि खोप लगाउनुपर्छ भन्ने हो । निजी क्षेत्र, स्थानीय सरकार र संघीय सरकार सबै मिलेर ल्याउन सक्यौँ भने राम्रो हुन्छ’, पौडेलले थपे ।

स्वास्थ्य सेवा विभागले तोकेको मापदण्ड, विश्व स्वास्थ्य संगठनले अनुमति दिएको खोपलाई मात्र प्रयोग गर्न सकिने उनले जानकारी दिए ।

उनका अनुसार स्थानीय तहले खोप राख्न सक्ने क्षमता, कस्तो खालको खोप खरिद गर्ने लगायतका विषयमा प्रष्ट भएर आएको खण्डमा त्यसमा विषयमा मन्त्रालय सकारात्मक रहेको छ । -फरकधार