धनगढी,२६ जेठ-सुदूरपश्चिम प्रदेशका भौतिक पूर्वाधार विकास मन्त्री दीर्घ बहादुर सोडारीविरुद्ध प्रहरीमा जाहेरी दर्ता भएको छ ।
नेकपा एमाले सुदूरपश्चिम सचिव राजेन्द्र रावलले सोडारीविरुद्ध सार्वजनिक हित सुरक्षा, सुविधा हक तथा अभद्र व्यवहार कसुर शीर्षकमा जिल्ला प्रहरी कार्यालयमा बुधवार मुद्दा दर्ता गरेका हुन् ।
मन्त्री सोडारीविरुद्ध जाहेरी दर्ता भएको पुष्टि जिल्ला प्रहरी कार्यालयका प्रवक्ता प्रहरी नायब उपरीक्षक प्रतीक विष्टले बताए ।
जाहेरी दर्ता भए सँगै अनुसन्धान प्रक्रिया अगाडि बढाएको उनले बताए ।
सोडारीले प्रदेश सचिव रावलमाथि आफ्नै कार्यकक्षमा सोमबार साँझ हातपात गर्दै दुर्व्यवहार गरेको घटना बाहिरिएको थियो ।
मुख्यमन्त्री विरुद्धको अविश्वासको प्रस्तावको विपक्षमा मतदान गर्न निर्देशनात्मक पत्र बुझाउन गएका बेला मन्त्री सोडारीले आफूमाथि हातपात गरेको रावलको भनाइ छ ।
मन्त्रीको सचिवालयले भने रावलले नै मन्त्रीमाथि दुर्व्यवहार गरेको प्रतिक्रिया दिइरहेको छ ।
