स्वास्थ्य केन्द्रमा कार्यरत धामी सम्पर्कविहीन भएपछि परिवारले खोजी गरिदिन आग्रह गर्दै प्रहरीसमक्ष निवेदन दिए। त्यसपछि उनको खोजी तीव्र पारियो। र, उनी गत शनिबार हट्टवानी सामुदायिक वनमा उनी मृत फेला परिन्।
उनको शव विभत्स अवस्थामा फेला परेको थियो। त्यसैले उनको हत्या भएको हुन सक्ने स्थानीयको आकलन छ।
घटनाको अनुसन्धानमा तीन टोली
घटनाको अनुसन्धानका प्रदेश प्रहरी कार्यालय, संघीय प्रहरी इकाइ कार्यालय र जिल्ला प्रहरी कार्यालय डडेलधुराका गरी तीन टोली खटाइएका छन्।
प्रदेश प्रहरी कार्यालयले सुदूरपश्चिम प्रदेश अनुसन्धान समूह (आरआइटी)का प्रहरी नायब निरीक्षक पदम थापाको कमान्डमा घटनाको अनुसन्धानका लागि टोली परिचालन गरेकाे छ।
यस्तै, संघीय प्रहरी इकाइ कार्यालयले प्रहरी नायब उपरीक्षक लक्ष्मण शाहीको नेतृत्वमा टोली खटाएको छ।
जिल्ला प्रहरी कार्यालय, डडेलधुराले कार्यालय प्रमुख एवं प्रहरी नायब उपरीक्षक महेन्द्र नेपालकाे नेतृत्वमा अनुसन्धानका लागि टाेली खटाएकाे छ।
प्रहरी नायब उपरीक्षक नेपालले मृतकको शरीरमा बाहिरी देखिने चोट पटक नदेखिए पनि हत्याको आशंकामा अनुसन्धान अगाडि बढाइएको जानकारी दिए।
तीन दिनपछि मात्रै पोस्टमार्टम
गत शनिबार मृत अवस्थामा फेला परेकी धामीको शव तीन दिनपछि आज (सोमबार) जोगबुडा अस्पतालमा परीक्षण (पोस्टमार्टम) गरिएको छ।
पोस्टमार्टम रिपोर्ट आउन अझै केही दिन लाग्ने प्रहरीले जनाएको छ। उनको भिसेरा परीक्षण गरिने जनाइएको छ।
‘प्रहरीले आफ्नो अनुसन्धान सकेको छैन। हामीले सोमबार पोस्टमार्टम गरेका छौं,’ जिल्ला प्रहरी कार्यालय, डडेलधुराका प्रवक्ता एवं प्रहरी निरीक्षक राजेन्द्र चन्दले भने, ‘रिपोर्ट सार्वजनिक भइसकेको छैन। हामी अनुसन्धानकै क्रममा छौं, अहिले नै केही भन्न सक्ने अवस्था छैन।’
शरीरमा नीलडाम देखिएको, शव फेला परेको स्थानसम्म घिसारेको जस्तो देखिएको र उक्त स्थानमा मदिराको खाली बोतल फेला परेकाले धामीको वीभत्स हत्या गरिएको हुन सक्ने स्थानीयको आकलन छ।
न्याय माग्दै आफन्त सडकमा
घटनाको सत्य तथ्य छानबिनको माग गर्दै मृतकका आफन्त आन्दोलनमा उत्रिएका छन्।
मृतकका आफन्तले सोमबार जोगबुढाको लाढुंगा बजारमा प्रदर्शन गरेका हुन्। प्रदर्शनका क्रममा आन्दोलनकारीले ‘धामीलाई न्याय दे, घटनाको सत्य तथ्य छानबिन गर’, ‘महिला हिंसा अन्त्य गर’, ‘धामीको बलात्कार गरी हत्या गर्नेलाई फाँसी दे’, ‘स्थानीय सरकार कान खोल’ लगायतका नारा लगाएका थिए।
यस्तै, आन्दोलनकारीले परशुराम नगरपालिकाका नगरप्रमुख भीमबहादुर साउदलाई उनीहरूले ६ बुँदे ज्ञापनपत्र बुझाएका छन्।
