फलामको पिँजडाजस्तै सानो बाक्सा । तार लट्ठामा झुन्ड्याइएको छ । बीचमा महाकाली नदी । दुवैतर्फ प्लास्टिकका डोरी बाँधिकएको छ । बाक्साभित्र विभिन्न निर्माण सामग्री भरेर पारितर्फबाट तानिन्छ । दुईरतीन जनाले डोरीले तानेर पारि पुगेपछि बाक्साभित्रका सबै सामग्री निकालिन्छ । त्यसपछि पुनः वारितर्फ तानेर भरेर पठाइन्छ । यो क्रम दिनभरि नै चलिरहन्छ ।

महाकालीमा निर्माणाधीन चार लेनको पक्की पुलका लागि तुइनबाट निर्माण सामग्री पारि लगिँदै । तस्बिर स् भवानीरकञ्चनपुर
यो दृश्य महाकाली नदीमा निर्माणाधीन ४ लेनको पक्की पुल निर्माणस्थलको हो । पुल निर्माणका लागि निर्माण सामग्री यही तुइनबाट नदीपारिसम्म पुर्‍याइन्छ । सिमेन्ट, बाइन्डिङ तार, कामदारका औजारलगायत सामग्री यसैबाट पारि पठाइन्छ ।

असार पहिलो साता महाकाली नदीमा आएको बाढीले पुलसम्मको पहुँचमार्ग बगाएपछि अस्थायी रूपमा सुरु भएको आवागमन बन्द हुनुका साथै निर्माणस्थलसम्म निर्माण सामग्री ढुवानीमा समेत समस्या भएको छ । झोलुंगे पुलबाट निर्माण सामग्री ढुवानी गर्न महँगो र झन्झटिलो हुने तथा शारदा ब्यारेजको पुलबाट समेत सहज नहुँदा निर्माण कम्पनीले तुइनको सहारा लिन थालेको हो । ‘एक पटकमा एक टनसम्म तुइनबाटै ढुवानी गर्न सकिन्छ,’ महाकाली पुल निर्माण कम्पनी सीएफईसी जेभीका साइट इन्जिनियर रवीन्द्र श्रेष्ठले भने, ‘अहिले सिमेन्टका बोरा र बाइन्डिङ तार तुइनबाट ढुवानी गरिरहेका छौं ।’ उनका अनुसार दिनभरिमा डेढ सय बोरासम्म ढुवानी भइरहेको छ ।

अहिले पुलको स्ल्याब ढलानको काम चलिरहेको छ । पुलका ३२ मध्ये २६ स्ल्याब ढलान भइसकेका छन् । ६ वटा स्ल्याब ढलानको तयारी भइरहेको हो । स्ल्याब ढलानको काम दसैंअगावै सक्ने योजना भए पनि अब मंसिर पुससम्म लम्बिएको छ । त्यसकै लागि आवश्यक निर्माण सामग्री तुइनबाट ढुवानी भएरहेको छ । ‘झोलुंगे पुलबाट ढुवानी गर्दा धेरै समय र खर्चिलो पनि छ,’ इन्जिनियर श्रेष्ठले भने, ‘भारततर्फको शारदा ब्यारेजबाट पनि सहजै ढुवानी गर्न सकिएन ।’

पहुँच मार्ग भत्किएकै कारण पारितर्फ सडक निर्माणको काम पनि बन्द हुन पुगेको छ । पुलदेखि दोधारा चाँदनीको मलेरिया नालासम्म करिब अढाई किलोमिटर सडक निर्माणको काम अब पहुँच मार्ग बनेपछि मात्रै सुचारु हुनेछ । वारिपट्टि सडक निर्माणको काम भने चलिरहेको छ ।

असारमै आएको बाढीले विभिन्न किसिमका उपकरणहरू बगाएकोले बर्खापछि मात्रै सडक कालोपत्रको काम अगाडि बढ्ने निर्माण कम्पनीका इन्जिनियर किशोर पाण्डेयले बताए । गड्डाचौकीदेखि पुलसम्म करिब ६ किलोमिटर सडकको बेस निर्माणको काम चलिरहेको छ । लकडाउनको अवधिमा समेत कामदारको कोरोना परीक्षण गरेर पुल निर्माणको काम धमाधम चलिरहेको थियो । तर बाढीले पहुँच मार्ग भत्काएपछि काम प्रभावित हुने अवस्था आएको थियो । पहुँच मार्गकै विकल्पमा तुइन जडान गरिएको हो ।