बाजुरा जिल्लाको ठुलो र सुन्दर छेडेदह तालको महिमा झल्किने गीतको म्युजिक भिडियो सार्वजनिक गरिएको छ ।
गायक जनक चदारा र धनसरा चदाराको लय रहेको गीतमा विजय थापाको सङ्गीत रहेको छ । प्रेममा परेको जोडीले प्रकृतिसँग रमाउँदा, एक अर्काको साथमा हुँदाको खुसी, याद गरेर बस्नु पर्दाको पीडालाई गीतमा उतारिएको छ ।
खप्तड छेडेदह गाउँपालिकाको सुन्दरतालाई माया प्रेमसँग तुलना गरिएको गीतको सम्पादन कृष्ण बाजुरेलीले गरेका हुन् । विशेष डिजिटल स्टुडियोमा रेकर्ड गरिएको गीतको म्युजिक भिडियोमा कलाकार मिना रोकाया, सागर सुनार र ज्योति सुनारले अभिनय गरेका छन् ।
गीतको भिडियो निर्देशन तथा छायाकंन धनबहादुर बिसीले गरेका छन् । प्रेम तालका रूपमा चिनिएको छेडेदह तालको प्राकृतिक सुन्दरतालाई प्रस्तुत गरिएको भिडियोमा माया प्रेमलाई नै गीतको मुख्य विषय बनाएको छ ।
अनेरास्ववियुका नेता राजेश सुनारको शब्द सिर्जना रहेको गीतमा सुदूरपश्चिमकी चर्चित देउडा गायिका रेखा जोशी र नव गायक जनक चदाराले स्वर दिनुभएको छ गीतमा नृत्य निर्देशक मोडल राजेश पायल विकले गरेका छन् ।
खप्तड छेडेदह गाउँपालिका ७ का अध्यक्ष खगेन्द्र रावत, सदस्य लालबहादुर खड्का, रणबहादुर ओली सहितको सहजिकरणमा गीतको छायाकंन नै छेडेदह तालकै सेरोफेरोमा गरिएको गायक जनक चदाराले बताउनुभएको छ।
तालको सुन्दरता गीतको भिडियोमा कैद गर्दा उत्कृष्ट भिडियो निर्माण भएको निर्देशक धनबहादुर बिसीले बताउनु भएको छ । तालको महिमा र विशेषताको प्रचार गर्न म्युजिक भिडियोले महत्त्वपूर्ण योगदान गर्ने वडा अध्यक्ष खगेन्द्र रावतले बताउनु भएको छ।
गाउँपालिका भित्र पर्ने महत्त्वपूर्ण स्थानको वर्णन, र विशेषता बारे गीत मार्फत संवोधन गर्न खोजिएको छ ।
