नेकपा एमालेले ह्वीप उल्लंघनको आरोपमा निष्कासन गरेका १४ सांसदको पद नजाने भएको छ।एमालेले कारबाही गरी उनीहरूलाई पदमुक्त गर्न संसद सचिवालयमा जानकारी गराए पनि संसद सचिवालयले उनीहरू अर्कै दल दर्ता गरी आएकाले कारबाही गर्नु नपर्ने निर्णय गरेको हो।
प्रतिनिधि सभाका सचिव गोपीनाथ योगीले सभामुख अग्निप्रसाद सापकोटाले उनीहरूले निर्वाचनमा आयोगमा अर्कै दल दर्ता गरी आएकाले कारबाही गर्नु नपर्ने निर्णय गरेको जानकारी दिए। योगीले भने,‘सभामुखले उनीहरू निर्वाचनमा आयोगमा अर्कै दल दर्ता गरी आएकाले कारबाही गर्नु नपर्ने निर्णय गर्नुभएको छ।’
एमालेले तत्कालिन प्रधानमन्त्री केपी शर्मा ओलीलाई विश्वासको मत नदिई ह्वीप उल्लंघन गरेको भन्दै माधवकुमार नेपालसहित १४ सांसदलाई कारबाही गरेर संसदलाई भदौ १ गते नै जानकारी गराएको थियो। तर संसद सचिवालयले एमालेले दिएको पत्रमा निर्णय गर्न ढिलाइ गर्दै आएको थियो।
एमालेले नेपालसहित मुकुन्द न्यौपाने, जीवनराम श्रेष्ठ, रामकुमारी झाँक्री, कल्याणी खड्का, लक्ष्मीकुमारी चौधरी, निरादेवी जैरू, पुष्पाकुमारी कर्ण, सरला यादव, कलिला खातुन, विरोध खतिवडा, कृष्णलाल महर्जन, भवानी खापुङ र मेटमणि चौधरीलाई ह्वीप उल्लंघनको आरोपमा कारबाही गरेको थियो।
निर्वाचन आयोगले नेपालको अध्यक्षतामा छुट्टै दल नेकपा (एकीकृत समाजवादी) दर्ता गरेको र ती सांसदहरू नयाँ दलमा रहेको भन्दै संसद सचिवालयले कारबाही गर्न नपर्ने भनी निर्णय गरेको सचिव योगीले जानकारी दिए।
एमालेले भने सांसदहरूलाई कारबाही गर्न सभामुख सापकोटालाई निरन्तर दबाब दिदै आएको थियो।
