अख्तियार दूरुपयोग अनुसन्धान आयोगको केन्द्रीय टोलीले मंगलवार कैलालीको गोदावरी नगरपालिकामा कागजात चेकजाँच गरेको छ।नगरप्रमुखको बैठक कक्षमा बसेर टोलीले नगरपालिकाका कागजात चेकजाँच गरेको हो। यस बिषयमा अनुसन्धानमा आएको अख्तियारको टोलीले भने बोल्न नमिल्ने बताएको छ। टोलीमा सहभागि एक अधिकारीले भने ‘यस बिषयमा हामीले बोल्न मिल्दैन अख्तियारका सूचना अधिकारी मार्फत जानकारी लिनुस्।’

सामान्यतया कुनै उजुरीका बारेमा अनुसन्धान गर्न अख्तियारको सुदूरपश्चिम कार्यालय महेन्द्रनगरको टोली आउने गरेको भएपनि केन्द्रबाटै टोली आएपछि जनचासो झन बढेको हो। यस बिषयमा अख्तियारको महेन्द्रनगर कार्यालयले समेत अनविज्ञता जनाएको छ। अख्तियार महेन्द्रनगरका सूचना अधिकारी हरिशचन्द्र जोशीले केन्द्रको अख्तियारको टोली किन आएको बारेमा आफूलाई जानकारी नभएको बताए

‘उहाँहरु अनुसन्धानका क्रममा आउनु भएको होला। छापा त नभनौ तर, यताको उजुरी पनि केन्द्रले हेर्ने गर्दछ। केन्द्रमा पुगेको उजुरी केन्द्रकै सरहरुले हेर्नुहुन्छ त्यो हामीहरुलाई थाहा हुँदैन’ उनले भने ‘सबै कुरा उहाँहरुले भनेर आउनु हुन्न। अनुसन्धानका क्रममा भन्दा हुन्छ।’

उनले अख्तियारको टोलीले स्थलगत अवलोकनमा जाँदा कागजात लिने भएपनि त्यसलाई छापा हानेको भन्न नमिल्ने बताए।

उता अख्तियार दूरुपयोग अनुसन्धान आयोग काठमाडौका सूचना अधिकारी वेदप्रसाद भण्डारीले भने आयोगको टोली नियमित छानबिनका क्रममा गोदावरीमा पुगेको बताए। उनले उजुरीका आधारमा छानबिन गर्न टोली कैलाली पुगेको बताए।

‘छानबिन गर्ने क्रममा पनि प्रमाण जुटाउनु पर्यो। स्थलगत निरिक्षण गर्नुपर्ने हुन्छ। कागजात हेर्नुपर्ने हुन्छ। गुणस्तर हेर्न पनि स्थलगत अध्ययन अवलोकन गर्नुपर्ने हुन्छ। यो नियमित प्रक्रिया हो’ उनले भने।