कैलालीमा स्वास्थ्य मापदण्ड पालना गरेर विद्यालय र फिल्म हल सञ्चालन गर्न पाइने भएको छ । स्वास्थ्यका सम्पूर्ण मापदण्ड पु¥याएर असोज १ गते सम्म विद्यालयहरू सञ्चालन गर्न अनुमति दिइएको जिल्ला प्रशासन कार्यालय कैलालीका सूचना अधिकारी शिवराज जोशीले बताए ।
‘हामीले सकेसम्म अनलाइन माध्यम र नभए भौतिक उपस्थितिमै विद्यालय सञ्चालन गर्न भनेका छौँ’,सूचना अधिकारी जोशीले भने,‘मापदण्ड पालना भए नभएको स्थानियतहले निरीक्षण गर्नुपर्ने हुन्छ,असोज १ गते सम्म विद्यालय सञ्चालन गर्दा हामीले कोरोना सङ्क्रमण बढ्छ अथवा यथावत् रहन्छ त्यो थाहपाउछौँ,त्यसपछि निरन्तर सञ्चालन गर्ने या नगर्ने बारे निर्णय हुन्छ।’
विद्यालय सञ्चालन गर्ने निर्णय गरी पनि पूर्णरुपमा निषेधाज्ञा भने नखुलेको उनले बताए । ‘आंशिक निषेधाज्ञा जारी छ,हामीले पूर्णरुपमा खोलेका होइनौ,अनावश्यक रूपमा भिडभाड तथा मेला,महोत्सव गर्न पाइने छैन,उनले भने,‘आवश्यक स्वास्थ्य सतर्कता अपनाएर फिल्म हल भने सञ्चालन गर्न पाइने छ।’
वैशाख १६ गते देखी कैलालीमा निषेधाज्ञा जारी गरिएको थियो । कोरोना सङ्क्रमणको अवस्थालाई हेरेर निषेधाज्ञामा कडाइ गर्ने वा खुलाउने बारे निर्णय गरिने जिल्ला प्रशासन कार्यालय कैलालीले जनाएको छ ।