धनगढी उपमहानगरपालिकामा सडकको अवस्था खराब छ । समयमै सडक मर्मत हुन नसक्दा स्थानीयहरू मर्कामा परेका छन्।
सडक मर्मतको काम एक वर्ष अघि नै पूरा हुने आश्वासन थियो, नगर प्रमुख नृपबहादुर वडको । गतवर्ष नै उनले भनेका थिए, ‘बिग्रेका भित्री सडक तिहार अगाडि नै बन्छन् ।’ एक वर्ष बितिसक्दा समेत उनको आश्वासन पूरा हुन सकेको छैन ।
क्षेत्रीय सहरी विकास आयोजना अन्तर्गत विभिन्न सडकको ठेक्काको काम अघि बढेपनि हालसम्म धनगढी बजार क्षेत्रको भित्री सडकमा सुधार हुन सकेको छैन ।
स्मार्ट सहर परिकल्पना गरिएको धनगढी उपमहानगरपालिकाको सडक ओहोरदोहोर गर्न समस्या हुने गरी बिग्रे पनि धनगढी उपमहानगरपालिका भने मुकदर्शक मात्र बनेको छ।
दैनिकरुपमा हिँड्न समेत गाह्रो हुनेगरी सडक बिग्रिए पनि उपमहानगरपालिकाले समस्या समाधान नगरेको भन्दै नगरबासी आक्रोसित भएका छन् । सडकमा बनेको खाल्डाखुल्डी र सडकको जर्जर अवस्थाले सो सडकमा हिँड्नेलाई त समस्या भएको छ नै, साथै आसपासका नगरबासीले समेत समस्या झेलिरहेका छन् ।
दैनिक रुपमा सो बाटोमा हिँड्ने गरेकी शिवनगरकी बासिन्दा पार्वती जोशीले खराब सडकका कारण हिँडडुल गर्न समस्या भएका बताइन् । ‘छोरा स्कुल जाने गर्दछ । घर फर्किंदा पूरै हिलैहिलो भएर आउँछ,’ उनले भनिन्, ‘बाटो बिग्रेका कारण विद्यालय जाने बालबच्चाहरुलाई समस्या भैरहेको छ ।’
शहीद गेट–क्याम्पस रोड सडक क्षेत्रमा थुप्रै विद्यालय, क्याम्पस पर्दछन् । त्यसैले सो सडकका दैनिक हजारौंको संख्यामा विद्यार्थीको ओहोरदोहोर गर्छन् । तर, सडकको अवस्था बिग्रेका कारण आउजाउ गर्न धेरै सास्ती भैरहेको ऐश्वर्य बहुमुखी क्याम्पसमा अध्ययनरत देवेन्द्र धामीले बताए ।
‘कलेज पुग्न नपाउँदै बाटोका कारण लुगा र जुत्ता पुरै खराब हुन्छ । बाटोका कारण बेलैमा कलेज पुग्न गाह्रो हुन्छ,’ उनले भने, ‘तर, यो हामीलेमात्रै भोगिरहेको समस्या होइन । यो सडकमा हिँड्ने सबैको समस्या हो ।’
सो सडकमा सवारी दुर्घटनाको जोखिम त छ नै । पैदल हिड्ने बटुवालाई गाडीले फाल्ने हिलोबाट जोगिन पनि समस्या भएको छ ।
धनगढी उपमहानगरपालिका भित्रका ग्रामीण क्षेत्रमा सहरी क्षेत्रको तुलनामा राम्रो सडक छ । तर, क्षेत्रीय सहरी विकास आयोजना लागू भएको धनगढीका सडक भने मर्मतको अभावमा दयनीय बनेका छन्।
थोत्रा सडकका कारण मान्छेलाई आउजाउ गर्नमात्रै समस्या भएको छैन, व्यापार व्यवसाय पनि प्रभावित भैरहेको व्यापारीहरूको गुनासो छ । सडक बिग्रेपछि मान्छेहरु हिड्न, सामान किन्न न रुचाउने गरेको व्यवसायी यज्ञराज बास्तोलाले बताए । ‘हिँडडुल गर्न गाह्रो छ । बाटो पोखरी जस्तो भएकाले त्यहाँ मान्छे लड्छ,’ उनले भने, ‘बाटोका कारण व्यापार पनि भैरहेको छैन ।’
क्षेत्रीय सडक विकास आयोजना अन्तर्गत गतवर्षदेखि सो सडक खण्डमा सडक निर्माणको कार्य सुरु गरिएको थियो । हालसम्म नाली बनाउने काम पनि पूरा हुन सकेको छैन । धनगढी बजार क्षेत्रको शहीद गेट–क्याम्पस रोड सडकमात्रै हैन, क्याम्पस चौक–कैलाली बहुमुखी क्याम्पस, भन्सार–चर्च गेट रोड, मालपोत कार्यालय रोड, धनगढी गाउँ घुईयाघाट रोड पनि थोत्रा छन् । थोत्रा सडकका कारण हिँडडुलमा मात्र समस्या हैन, दुर्घटनाको जोखिम समेत बढेको छ ।
धनगढी उपमहानगरपालिकाका प्रवक्ता सन्तोष मुडभरीले कोरोना महामारीका कारण जारी लकडाउनका कारण सडक मर्मत हुन नसकेको स्वीकार गर्छन् । यस्तै उनले सो अवधिमा खोलानालाबाट गिट्टी, बालुवा ल्याउन नपाइएका कारण समेत मर्मत कार्य प्रभावित भएको बताए ।
‘शहीद गेट–क्याम्पसरोड सडकमा अहिले नाली निर्माणको काम भैरहेको छ’, उनले भने । ‘बीचमा लकडाउनको कारण काम हुन नसकेपछि खाल्डाखुल्डी पर्यो । त्यो मिलाउने काम गर्न सकिएको छैन । तर, चाँडै मर्मत गरेर आवतजावत सहज बनाउँछौं ।’
उनले सडकमा परेको खाल्डाखुल्डी मर्मतका लागि क्षेत्रीय सहरी विकास आयोजनालाई आग्रह गरिने बताए। सो सडक निर्माणको कार्य चाँडै हुने मुडभरीको भनाइ छ ।