नेपाली कांग्रेसको केन्द्रीय निर्वाचन समितिले थप तीन जिल्लाको क्रियाशील सदस्यता विवरण सार्वजनिक गरेको छ ।
सर्लाही, धनुषा र कैलालीको सदस्यता विवरण समितिले सार्वजनिक गरेको हो ।
पूर्वमहामन्त्री कृष्णप्रसाद सिटौला नेतृत्वको विवाद टुंग्याउन गठित समितिले लामो कसरतपछि सर्लाही निर्वाचन क्षेत्र नम्बर–२ र धनुषा निर्वाचन क्षेत्र नम्बर–४ को विवाद टुंग्याएको हो ।
निर्वाचन समितिका सचिव केशव रिजालले विवाद टुंग्याएर सदस्यता विवरण समितिलाई प्राप्त भएपछि वेभसाइटमार्फत् सार्वजनिक गरिएको बताए ।
सदस्यता सार्वजनिक भएकामध्ये सर्लाही र धनुषा प्रदेश २ का जिल्ला हुन् । यसअघि सिरहा र महोत्तरीको सदस्यता विवरण सार्वजनिक भइसकेको छ ।
सदस्यता सार्वजनिक भएको अर्को जिल्ला कैलाली भने सुदूरपश्चिम प्रदेशको जिल्ला हो ।
यससँगै अब प्रदेश २ को बारा, पर्सा, सप्तरी र रौतहटको सदस्यता विवरण टुंगो लाग्न बाँकी छ । बागमती प्रदेशको र सुवा पनि बाँकी नै छ ।
सिटौला नेतृत्वको समिति चाँडै विवाद टुंग्याउने गरी खटिरहेको समितिका एक जना सदस्य डा।मिनेन्द्र रिजालले बताए ।
प्रदेश–२ का जिल्लाहरूमा समायोजनसँगै क्रियाशील सदस्यता वितरण र नवीकरणमा संस्थापन पक्षले धाँधली गरेको आरोप संस्थापनइतर पक्षको छ ।
रसुवामा भने विभिन्न पार्टी परित्याग गरेर कांग्रेसका आएका नेताहरूलाई पार्टी कब्जा गर्ने गरी सदस्यता दिएको भन्दै संस्थापनइतर पक्ष असन्तुष्ट भएको छ ।
वडा तहकै निर्वाचन बाँकी
प्रदेश २ को आठसँगै रसुवा, कैलाली, डोल्पालगायत १३ जिल्लामा वडा अधिवेशन पनि हुन बाँकी छ । अन्यन्त्र सकिएको छ । पालिका अधिवेशन पनि ५६ जिल्लाको भइरकेको छ ।
निर्वाचन समितिका सचिव रिजालले यी १३ वटै जिल्लामा दसैंअघि नै निर्वाचन गर्ने गरी कार्यतालिका संशोधन गर्नुपर्ने भएको फरकधारलाई बताए ।
‘निर्धारित कार्यतालिका अनुसार वडा तहको र पालिकास्तरको अधिवेशन गर्न सकिएन, जुन सदस्यता नटुंगिएर हो’, रिजालले भने, ‘तर, दसैंअघि नै अधिवेशन सकिने गरी फेरि कार्यतालिका संशोधन गर्नुपर्ने भएको छ ।’
२१ वटा हिमाली जिल्लाको पनि दसैंअघि नै अधिवेशन गर्ने यसअघि नै निर्णय भइसकेको छ । कार्यतालिका भने संशोधन हुन बाँकी छ ।
यद्यपि, दसैंअघि हिमाली जिल्लाको २१ जिल्लाको अधिवेशन गर्ने पदाधिकारीहरूको निर्णयप्रति संस्थापनइतर पक्षका एक नेता डा.शेखर कोइराला असन्तुष्ट छन् ।
एकैसाथ अधिवेशन हुनुपर्ने उनको अडान छ । उनी सभापति पदका आकाङ्क्षीसमेत हुन् ।