धनगढी- कञ्चनपुरको दोधराचाँदनी नगरपालिका वडा नम्बर ३ मा रहेको गणेश आधारभूत विद्यालयमा ३ कोठे पक्की भवन र २ कोठे शौचालय निर्माण सुरु भएको छ । अनुमानित ४३ लाख २३ हजार ३ सय ८४ रुपैयाँ ५४ पैसा अनुमानित कुल लागत रहने गरी विल्ड अन नेपाल र नगरपालिकाको संयुक्त साझेदारीमा सुरु भएको निर्माण हुन लागेको भवनको मङ्गलवार एक कार्यक्रमका बिच शिलान्यास गरिएको हो ।
१ सय ६ दिनमा काम सक्ने गरी सुरु भएको योजनामा विल्डअन नेपालले ३० लाख ८ हजार ६ सय १५ रुपैयाँ ६४ पैसा र नगरपालिकाले १३ लाख १४ हजार ७ सय ६४ रुपैयाँ ९० पैसा बेहोर्ने सम्झौता गरिएको छ । परियोजनालाई सञ्चालन गर्नका लागी दीपक नेपालीको संयोजकत्वमा १४ सदस्यीय समिति गठन गरिएको छ ।
आयोजनाबाट २ सय ५० घरधुरी र २ सय ७१ विद्यार्थी लाभान्वित हुनेछन् । शिलान्यास समारोहलाई सम्बोधन गर्दै दोधाराचादनी नगरपालिका उपप्रमुख गंगादेवी जोशीले दुर्गममा रहेको विद्यालयको भवन निर्माण हुनु नगरपालिकाका लागी गौरवको विषय भएको बताइन् ।‘विल्डअन नेपाल र हाम्रो नगरपालीको साझेदारीमा भवन निर्माण हुँदै छ ।अव यहाँका बिद्यार्थीहरुले शौचालय र भवनको अभावले दुःख पाउने समस्याको अन्त्य हुनेछ,’जोशीले भनिन् ।
विद्यालय व्यवस्थापन समिति अध्यक्ष कृष्ण बहादुर ओलीले विल्डअन नेपालको पहलमा विद्यालयमा शौचालय र भवन बन्न लागेकोमा खुसी व्यक्त गरे । ‘तपाई हाम्रा नानीवावुहरुले सुविधा सम्पन्न भवनमा अध्ययन गर्न पाउने भए हामी भाग्यमानी हौँ । समयमै भवन निर्माण सम्पन्न गर्न सबैले सहयोग गर्नुपर्छ,’ओलीले भने ।
भवन निर्माणमा स्थानीयहरूले जनश्रमदान गर्नेछन् । जनश्रमदानमा सहभागी हुन अमेरिका लगायतका देशबाट एससीवी कम्पनीका १९ जना विदेशी नागरिकहरू पनि आएका छन् । उनीहरू दैनिक ४ घण्टाका दरले दुई दिन श्रमदान गरेर फर्किनेछन् ।
कञ्चनपुरमा ९२ विद्यालयका रूपमा गणेश आधारभूत विद्यालयको भवन निर्माण कार्य सुरु भएको विल्डअन नेपाल प्रमुख निर्मला चौधरीले बताइन् । ‘विद्यालय भवन अभाव र जीर्ण रहेका स्थानमा हामी भवन निर्माण गर्दै आइरहेकाछौँ। यसअघि कञ्चनपुरमा मात्र ९१ विद्यालयका भवन निर्माण गरेका छौँ। कैलालीमा १ सय ९८ विद्यालयका भवन र शौचालय वनेका छन् । बाँके,बर्दिया,नुवाकोट,सिन्धुपाल्चोक,गोर्खा र सिराहा गरी नेपालभर ३ सय ९६ बिद्यायका भवन र शौचालय निर्माण भइसकेका छन्,’चौधरीले भनिन् ।
विद्यालय भवन निर्माणका क्रममा स्थानीय र दातृसंस्थामा लगानी गर्ने वैदेशिक लगानीकर्तासमेत श्रमदानमा खटिएको उनको भनाइ छ ।
‘छड, सिमेन्ट, फलाम, फर्निचरलगायत सामाग्री हामी सहयोग गछौँ। बालुवा, गिट्टी र ढुङ्गाको व्यवस्थापन पालीकाले गर्ने गरेको छ । सन् १९९४ देखि विद्यालयका संरचना निर्माण र साक्षरता शिक्षामा हामी सहयोग गर्दै आएका छौँ,’विल्डअन नेपाल कन्ट्री डाइरेक्टर निर्मला चौधरीले भनिन् ।