कैलालीको बर्दगोरियामा चालू आर्थिक वर्षमा ३ वटा झोलुङ्गे पुल बन्ने भएका छन् । प्रतिनिधि सभा सदस्य झपटबहादुर रावलको पहलमा सङ्घीय सरकारको लगानीमा पालिकाको वडा नम्बर ३ र २ जोड्ने कुइरा नदी, वडा नम्बर ३ र ४ जोड्ने काडां नदी र वडा नम्बर ६ र घोडाघोडी नगरपालिका वडा नम्बर ३ जोड्ने काडां नदीमा पुल निर्माणको काम सुरु हुने भएको हो ।
करिब ३ सय मिटर बढी लम्बाई रहेको वडा नम्बर ३ र २ जोड्ने पुल निर्माणका लागि ससपेन्सन ब्रिज डिभिजनले टेन्डर आह्वान गरिसकेको छ भने एक सय मिटर बढी लम्बाई रहेका अन्य दुई वटा पुल निर्माणको काम उपभोक्ता समिति मार्फत अघि बढ्ने भएको छ । थप प्रक्रिया अघि बढाउन स्थानीय पालिकाले सुदूरपश्चिम सामुदायिक विकास मञ्च धनगढीसँग सम्झौता गरेको छ ।
डिभिजन मार्फत निर्माण हुने पुल कार्तिक महिनाबाट निर्माण कार्य सुरु गर्ने गरी काम अघि बढेको बताइएको छ । भर्खर टेन्डर खोलेका छौ । पुल निर्माणको काम कार्तिक महिनाबाट सुरु गर्ने गरी अघि बढेका छौ ।
‘डिभिजनले भन्यो,‘निर्माण सम्पन्न कहिले हुन्छ भन्ने विषयमा थप लगानी, निर्माण कम्पनीको सक्रियता र त्यहाँका स्थानीयहरूको निगरानीमा भर पर्छ।’
यता पालिका मार्फत बन्ने अन्य दुई वटा पुल निर्माणको प्रक्रिया भने अघि बढेको छैन । प्रतिकुल मौसमको अभावले काम अघि बढ्न नसकेको र अब चाडै स्थलगत अनुगमन गरी डिजाइन स्टिमेट तयार पार्ने सुदूरपश्चिम सामुदायिक विकास मञ्च धनगढीले जनाएको छ । ‘हामीले सामाजिक तथा प्राविधिक सहयोग गर्ने हो,’विकास मञ्चका अध्यक्ष गणेशमान श्रेष्ठले भने,‘पुलको स्टिमेट तयार पारि पालिकामा पेस गर्छौ र पालिकाले उपभोक्ता समिति गठन तथा आवश्यक कच्चापदार्थका लागि टेन्डर आह्वान गर्ने हो।’पुलका लागि आवश्यक थप लगानीका लागि समेत पालिकाले माथिल्लो निकायमा अनुरोध गर्नु पर्ने उनको भनाइ छ ।
यस क्षेत्रका नागरिकहरूले पुल अभावमा बर्षौ देखि समस्या भोग्दै आएका छन् । पुल अभावका कारण सिकिस्त बिरामी तथा नदी तर्नै पर्ने बाध्यताका कारण जोखिम मोल्ने धेरैले अकालमै ज्यान गुमाउनु पर्ने बाध्यात्मक अवस्था रहेको छ । यो समस्या समाधानका लागि यस क्षेत्रका नागरिकहरूले बारम्बार सरकारलाई आग्रह गर्दै आएका छन् ।
