दार्चुलाको तुइन घटनाको प्रतिवेदन सार्वजनिक नहुँदै अनुसन्धान समिति सदस्य रहेकी दार्चुलाको सहायक प्रमुख जिल्ला अधिकारी ज्योत्सना भट्ट भारतको दिल्ली पुगेकी छिन्।
१५ साउनमा तुइनबाट महाकाली नदी तर्ने क्रममा भारतीय एसएसबीले तार काटिदिएपछि दार्चुलाको व्यास गाउँपालिका –२ माल गाउँका जयसिंह धामी नदीमा बेपत्ता भएको प्रत्यक्षदर्शीहरूको भनाई छ।
तेस्रो पटक म्याद थप्दा पनि समितिले प्रतिवेदन दिन नसक्नु र अनुसन्धान नसकिँदै समिति सदस्य भारतको दिल्ली पुग्नुलाई रहस्यपूर्ण ढङ्गले हेरिएको छ।
भारतले बेपत्ता धामीको खोजीका लागि ड्रोन उडाउन पनि अनुमति दिएको थिएन।
तर दार्चुलाका प्रमुख जिल्ला अधिकारी सिद्धराज जोशी भने सहायक प्रमुख जिल्ला अधिकारी भट्ट दिल्ली नगएको जिकिर गर्छन्। ‘उहाँ घटनाको अनुसन्धान समिति सदस्य हुनुहुन्छ,घटनाको अनुसन्धानको लागी समिति खटिएको छ,उहाँ त्यही कामले काठमाडौँ जानुभएको हो’,जोशीले भने।
जिल्ला प्रशासन कार्यालय दार्चुलाका एक कर्मचारीले सहायक प्रमुख जिल्ला अधिकारी भट्ट दिल्ली गएको पुष्टि गरे। ‘अनुसन्धान समिति काठमाडौँ फर्किएको केही दिन पछि उहाँ पनि काठमाडौँ जानुभएको हो,त्यसपछि उहाँ त्यहीबाट दिल्ली जानुभयो,’उनले भने,‘के कति कामले हो थाहा भएन तर उहाँ दिल्ली जानु भएको छ।’
घटनाको अनुसन्धानका लागि सरकारले गृह मन्त्रालयका सह सचिव जनार्दन गौतमको नेतृत्वमा समिति गठन गरेको छ। समितिले घटनाको अनुसन्धान गरिरहेको जनाएको छ।
समितिमा नेपाल प्रहरीका प्रहरी नायव महानिरीक्षक पुरुषोत्तम कँडेल, राष्ट्रिय अनुसन्धान विभागका अनुसन्धान निर्देशक हुतराज थापा, सशस्त्र प्रहरी बल नेपालका प्रहरी वरिष्ठ उपरीक्षक सुरेश कुमार श्रेष्ठ र जिल्ला प्रशासन कार्यालय, दार्चुलाका सहायक प्रमुख जिल्ला अधिकारी ज्योत्सना भट्ट सदस्य छन्।
समितिले रिपोट बुझाउन नसकेपछि तेस्रो पटक ७ दिनका लागि म्याद थप गरिएको छ।
घटनाको निचोडमा पुग्न केही समय लाग्ने अनुसन्धान समिति संयोजक एवं गृह मन्त्रालयका सह सचिव जनार्दन गौतमले बताए।
समितिको सदस्य रहेकी दार्चुलाकी सहायक प्रमुख जिल्ला अधिकारी भट्ट दिल्ली गएको बारे आफूलाई जानकारी नभएको गौतमले बताए ।
‘म काठमाडौँ फर्किए,समितिका अन्य सदस्यहरू सुदूरपश्चिममै हुनुहुन्छ,थप अनुसन्धानका लागी समितिको म्याद ७ दिन थपिएको छ,केही दिनमै हामी गृह मन्त्रालयमा प्रतिवेदन पेस गर्छौँ,गौतमले भने,‘समिति सदस्य ज्योत्सना मेरो सम्पर्कमा हुनुहुन्न,दिल्ली गए पनि आफ्नै कामले जानुभएको होला हामीले पठाएका होइनौँ।’
गत १५ साउनमा सदरमुकाम खलङ्गा आउन तुइन तर्दै गर्दा एसएसबीले डोरी फुकालिदिएपछि व्यास गाउँपालिका –२ माल गाउँका धामी महाकालीमा बेपत्ता भएका थिए। उनी अझै फेला परेका छैनन्।
साउन १७ गते गृह मन्त्रालयले गठन गरेको समितिले १० दिनभित्र प्रतिवेदन सार्वजनिक गर्ने भनिए पनि २१ दिन बित्दा पनि प्रतिवेदन सार्वजनिक गरेको छैन।
