कैलाली : कैलालीको मोहन्याल गाउँपालिकाका अध्यक्ष देवीदत्त उपाध्यायले विषेश अदालतबाट सफाई पाएका छन्। अध्यक्ष उपाध्यायले बिहीवार विशेष अदालत काठमाडौंबाट सफाई पाएका हुन्।
गत बैशाख ३० गते सम्पन्न स्थानीय तहको निर्वाचनमा नेकपा माओवादी केन्द्रबाट गाउँपालिकाको अध्यक्षमा निर्वाचित भएका उपाध्यायलाई राजश्व हिनामिना गरि सार्वजनिक सम्पत्तिको हानि नोक्सानी गरेको भनेर विशेष अदालतमा मुद्दा दायर भएको थियो।
२०७४ को स्थानीय तहको निर्वाचनमा वडा नम्बर २ को अध्यक्षमा निर्वाचित उपाध्यायलाई नदीजन्य पदार्थ उत्खनन् गर्न लगाइएको ठेक्काको कम मुल्यांकन गरेर राजश्व संकलनमा हानि नोक्सानी पुगाएको भन्ने आरोप लगाइएको थियो।उपाध्यायसँगै गाउँपालिकाका अध्यक्ष, उपाध्यक्ष,प्रमुख प्रशासकीय अधिकृतमाथि राजश्व हिनामिना गरेको अभियोगमा अदालतमा मुद्दा चालाइएको थियो। तर विशेष अदालतबाट सबैले सफाई पाएको उपाध्यायले दिनेशखबरलाई बताए।
‘मैले र यो मुद्दामा विपक्षी बनाइएका सबैले विशेष अदालतबाट १० महिनामा न्याय पाएका छौँ, हामी सबैलाई अदालतले सफाई दिएको छ,’ उनले भने, ‘हामीले गलत गरेका थिएनौँ, अदालतले न्याय दिएको छ।’ अदालतमा मुद्दा परेका कारण गाउँपालिकाको अध्यक्षमा निर्वाचित भए पनि उपाध्यायले कार्यभार सम्हान पाएका थिएनन्।
अब भने भोलि अर्थात आइतबार गाउँपालिकाको कार्यभार सम्हाल्ने उपाध्यायल बताएका छन्। ‘निर्वाचित भएदेखि अहिलेसम्म तनावमा बस्नु परेको थियो। अब पाँच वर्षमा गर्नुपर्ने काम चार वर्षमा गर्ने हिसाबले काममा लाग्छु। शिक्षा, स्वास्थ्य, बाटोघाटो, रोजगारी र कृषि क्षेत्रमा काम गर्न भोट मागेअनुसार काम गरेर देखाउने चुनौती इमानदार भएर पूरा गर्ने प्रयास गर्नेछु।’ अध्यक्ष उपाध्यायले भने।