धनगढी – ‘लम्पी स्किन’ रोगको सङ्क्रमण बाट कैलालीमा २ सय ७५ पशु चौपायाको मृत्यु भएको छ । भेटेरिनरी अस्पताल तथा पशुसेवा विज्ञ केन्द्र कैलालीले दिएको तथ्याङ्क अनुसार हाल सम्म १ सय १६ बाच्छा–बाच्छी,९६ गाई,४५ गोरु,१८ भैँसी मरी सकेका छन् भने यो रोगबाट २५ हजार ७ सय ८५ पशु सक्रिय सङ्क्रमित छन् ।
जसमा ७ हजार ५ सय ६० बाच्छा–बाच्छी, ८ हजार २ सय २५ गाई,४ हजार ५ सय ६० गोरु,५ हजार ४ सय ४० भैँसीमा सङ्क्रमण देखिएको छ । रोग नियन्त्रणका लागी हाल सम्म कैलालीका ५ हजार ८ सय ३८ पशुचौपायलाई खोप लगाइएको कार्यालयका वरिष्ठ पशु चिकित्सक डा. हेमराज अवस्थीले जानकारी दिए ।
‘लम्पी स्किन महामारीका रूपमा फैलिँदै गएको छ । कैलालीमा तत्काल २ लाख डोज खोप आवश्यक छ । हामी सँग अहिले ६ हजार डोज मात्रै उपलब्ध छ । १५ दिन भित्र ५० हजार डोज खोप उपलब्ध गराइदिन मन्त्रालय सँग माग गरेका छौँ,’अवस्थीले भने ।
प्रत्येक पालीका सँग महामारी रोग नियन्त्रणका लागी एक लाखका दरले बजेट भए पनि खोप खरिद गर्न पालिकाहरू अग्रसर नहुँदा रोग नियन्त्रणमा समस्या देखिएको उनको भनाइ छ ।
