काठमाडौं – नेकपा एमालेको स्थायी कमिटी बैठक स्थगित भएको छ। बैठक दिउँसो १ बजे बालुवाटारमा बस्ने बोलाइएको थियो। प्रधानमन्त्री केपी शर्मा ओलीले दिउँसो २ बजे देशवासीका नाममा सम्बोधन गर्ने भएपछि स्थायी कमिटी स्थगित गरिएको एमाले पार्टी कार्यालयले जनाएको छ।
शेरबहादुर देउवा प्रधानमन्त्रीमा नियुक्त हुने भएपछि ओली स्वत: प्रधानमन्त्रीबाट पदमुक्त भएका हुन्। सोमबार सर्वोच्च अदालतले प्रतिनिधिसभा विघटन गर्ने ओली सरकारको निर्णय असंवैधानिक ठहर गर्दै शेरबहादुर देउवालाई प्रधानमन्त्री नियुक्त गर्न परमादेश जारी गरेको थियो। सोही आदेशअनुसार मंगलबार देउवा प्रधानमन्त्रीमा नियुक्त हुन लागेका हुन्।
प्रधानमन्त्रीमा शेरबहादुर देउवा नियुक्त र प्रतिनिधिसभा विघटन असंवैधानिक भन्दै नेपाली कांग्रेसलगायत विपक्षी गठबन्धनका १४६ सांसदले सर्वोच्च अदातलमा रिट हालेका थिए। सोमबार सर्वोच्च अदालतले देउवा पक्षमा फैसला गरिदिएपछि देउवा पाँचौं पटक प्रधानमन्त्री बन्न लागेका हुन्।
