नेपाली कांग्रेसका सभापति तथा शेरबहादुर देउवाले आफ्नो मन्त्रिपरिषद् विस्तारका लागि आज माओवादी केन्द्रका अध्यक्ष पुष्पकमल दाहाल प्रचण्डसँग छलफल गर्ने भएका छन् । देउवानिकट एक नेताका अनुसारका आज यी दुई नेताबीच भेटघाट हुँदैछ, यो भेटघाटमा मन्त्रालयको संख्या बाँडफाँडबारे कुराकानी हुँदैछ ।
यसअघि सोमबार सर्वोच्च अदालतले देउवालाई प्रधानमन्त्रीमा नियुक्त गर्न परमादेश दिएपछि राष्ट्रपति विद्यादेवी भण्डारीले उनलाई मंगलबार प्रधानमन्त्रीमा नियुक्त गरेकी थिइन् । त्यही दिन प्रधानमन्त्री पदको सपथ लिएका देउवाले आफूसँग चार जनालाई मात्र मन्त्री पदको सपथ खुवाएका छन् । यी चार जनामध्ये दुई जना गृहमन्त्री बालकृष्ण खाँण र कानुनमन्त्री ज्ञानेन्द्र कार्की नेपाली कांग्रेसबाट मन्त्री बनेका छन् भने अर्थमन्त्री जनार्दन शर्मा र ऊर्जामन्त्री पम्फा भुसाल माओवादी केन्द्रबाट मन्त्री बनेका छन् ।
केही समयका लागि सानो टिम नै सरकारका रुपमा बनाएर अगाडि बढ्न लागेका देउवाले अर्को साता अब मन्त्रिपरिषद् विस्तार गर्नेछन् ।
पाँच दलीय गठबन्धनको आधारमा प्रधानमन्त्री बनेकाले देउवाले आफ्नो क्याबिनेटमा सबै दललाई समावेश गर्ने भएका छन् । यी पाँच दलमध्ये राष्ट्रिय जनमोर्चाले देउवालाई सरकारमा समर्थन गर्ने भए पनि आफूले मन्त्री पद दाबी नगर्ने जनाइसकेको छ ।
अर्को दल नेकपा एमालेको माधवकुमार नेपाल समूह पनि सरकारमा जाने वा नजाने भन्ने विषयमा अहिलेसम्म निर्णित छैन । उसले अबका केही दिनमा नै सरकारमा जाने वा नजाने भन्ने निर्धारण गर्नेछ । एमालेमा पछिल्लो समय देखिएको विवादका कारण पार्टी फुट्न सक्ने अनुमान नेपाल पक्षका नेताहरुको रहेको छ । उनीहरुले पार्टी विभाजन गरेको खण्डमा सरकारमा सहभागिता जनाउन सक्ने सम्भावना पनि छ ।
बुधबार माधवकुमार नेपाल निवासमा ‘टि मिटिङ’का लागि पुगेका प्रधानमन्त्री देउवाले माधवकुमार नेपाल समूहलाई पनि सरकारमा आउन आह्वान गरेका छन् । नेपालले भने आफूले विश्वासको मत लिए पनि सरकारमा सामेल हुनेबारे अहिले नै नसोचेको बताएका छन् ।
प्रधानमन्त्री देउवालाई विश्वासको मत लिन २३ जना माधवकुमार नेपाल पक्षका सांसद महत्वपूर्ण हुने भएकाले पनि नेपाल पक्ष सरकारमा आउँदा आफूलाई सहज हुने देउवाको बुझाइ छ ।
कांग्रेसका ६१ जना, माओवादी केन्द्रका ४९, जसपाका १२ र राष्ट्रिय जनमोर्चाका १ सांसदको समर्थन पाएर प्रधानमन्त्री भएका देउवाले अब सांसद संख्याको अनुपातको हिसाबमा नै मन्त्रालयको बाँडफाँड गर्ने तयारी गरेका छन् ।
यसअघि माओवादी केन्द्रले देउवासँग गृह र अर्थ दुवै मन्त्रालय माग गरेको थियो । तर, देउवाले माओवादी केन्द्रलाई दुईमध्ये एक दिन सकिने भन्दै अर्थमन्त्रालयको जिम्मेवारी दिएका छन् भने गृह कांग्रेससँगै राखेका छन् ।
देउवाको पूर्ण क्याबिनेट बनेको खण्डमा यो सरकारमा सबैभन्दा बढी सहभागी पनि नेपाली कांग्रेसको नै हुने भएको छ । देउवानिकट एक नेताका अनुसार देउवाले कांग्रेसलाई ९, माओवादी केन्द्रलाई ७, माधवकुमार नेपाल समूहलाई ५ र जसपालाई ४ मन्त्रालयको जिम्मेवारी दिने तयारी गरेका छन् ।
देउवालाई समर्थन गरेको राष्ट्रिय जनमोर्चाले आफू सरकारमा नजाने बताइसकेको छ ।
तर, नेपाल समूह सरकारमा नआएको खण्डमा यसलाई छुट्याएको ५ मन्त्रालयले फेरि कांग्रेस, माओवादी केन्द्र र जसपालाई विभाजन गर्ने देउवाको तयारी रहेको उनीनिकट एक नेताले बताए । यस्तो भएको खण्डमा कांग्रेसले प्रधानमन्त्रीसहित ११ मन्त्रालयको जिम्मेवारी सम्हाल्ने छ ।
जसपाले आफ्नो पार्टीमा रहेको आन्तरिक किचलो मिलाउनका लागि केही दिनको समय माग गरेको छ । जसपाको विवाद एउटा निष्कर्षमा पुगेपछि उपप्रधान तथा परराष्ट्रमन्त्रीका रुपमा उपेन्द्र यादवले सरकारमा जसपाको नेतृत्व गर्ने तयारी रहेको स्रोतको दाबी छ ।
देउवाले अर्को सातासम्म पूर्णरुपमा मन्त्रिपरिषद् विस्तार गर्न सक्ने सम्भावना बलियो हुँदै गएको उनीनिकट ती नेताले बताए । ‘अहिले स्वास्थ्यमा निकै ठूलो समस्या छ, कोरोना महामारी छ,’ ती नेताले भने, ‘त्यसैले पनि प्रधानमन्त्रीले छिटो सरकारलाई ‘फंसनल’ बनाउन खोज्दै हुनुहुन्छ, त्यसका लागि मन्त्रिपरिषद् विस्तार गर्नुहुन्छ ।’
