धनगढी – कैलालीको धनगढी स्थित चटकपुरमा यौन धन्दा सञ्चालन गरिरहेको पहाडगंज होटेलका सञ्चालक सहित एक जोडीलाई प्रहरीले पक्राउ गरेको छ । सोमवार बेलुकी सुदूरपश्चिम प्रदेश प्रहरीको आरआइटीको टोली र वडा प्रहरी कार्यालयको टोलीले छापा हान्दा सञ्चालक सहित यौन कार्यमा संलग्न एक युवती र एक युवक पक्राउ परेका छन् । यौन धन्दा सञ्चालन भइरहेको भन्ने सूचनाका आधारमा छापा हान्दा २४ वर्षीय युवती र २१ वर्षीय युवक रंगेहात पक्राउ परेको वडा प्रहरीका कार्यालय प्रमुख प्रहरी निरीक्षक जनक ढुङ्गानाले जानकारी दिए ।
पक्राउ परेका युवायुवती सँगै होटेल सञ्चालक लक्ष्मण खड्कालाई नियन्त्रणका लिई थप अनुसन्धानका लागी जिल्ला प्रहरी कार्यालय कैलालीमा बुझाइएको छ । प्रहरी निरीक्षक ढुङ्गानाका अनुसार पक्राउ परेकी युवती होटेल सञ्चालक खड्काले जागिरमा राखी यौन धन्दा चलाइरहेकी हुन भने युवक ग्राहक हुन् ।
प्रहरी निरीक्षक ढुङ्गानाले हिजोबाट मात्रै वडा प्रहरी कार्यालयको प्रमुखको कार्यभार सम्हालेका हुन्।
यसअघिका इन्स्पेक्टर उपेन्द्र बमको सुदूरपश्चिम प्रदेश प्रहरी कार्यालयमा दरबन्दी रहेकोमा जिल्ला प्रहरी कार्यालय कैलालीमा काज सरुवा भएको छ।
उनको सरुवापछि ढुङ्गाना आएका हुन्। उनी यसअघि इलाका प्रहरी कार्यालय टीकापुरमा थिए।
