टीकापुर अस्पतालमा कोरोना संक्रमित बिरामी निको हुने दर बढेको छ । अस्पतालमा उच्च उपचार कक्ष (एचडीयू) को व्यवस्थापन र अक्सिजन आपूर्ति सहज भएपछि बिरामीको ज्यान जोगिन थालेको हो ।
अस्पतालका मेडिकल सुपरिन्टेन्डेन्ट डा.रेमकुमार राईले अस्पतालको टिमले संक्रमितको उपचारमा राम्रो भूमिका गरेको र स्थानीयस्तरबाट पनि अक्सिजनको व्यवस्थापनमा सहयोग भएपछि मृत्युदर कम हुँदै गएको बताए । ‘गम्भीर अवस्थामा बिरामीलाई एचडीयूमा, सामान्यलाई जनरल वार्डमा र कतिपयलाई अब्जरभेसनमा राखेर उपचार थाल्यौं,’ उनले भने, ‘सबैको सहयोगले संक्रमित बिरामी मर्ने संख्यामा कमी आएको छ ।’
संक्रमितको संख्यामा भने अझै कमी नआएको डा.राईले बताए । उनले भने, ‘सामान्य अवस्थाका बिरामी अस्पताल आएका छैनन् । घरमा थेग्न नसक्नेहरू अस्पताल आइरहेका छन् ।’ उनका अनुसार एकै दिन धेरैको संख्यामा मृत्यु भइरहेको थियो । वैशाख २६ गते ६ जना र वैशाख २७ गते ८ जनाको मृत्यु भएको थियो । ‘आंशिक रूपमा भए पनि हामीले भेन्टिलेटर सञ्चालनमा ल्यायौं । अहिले मृत्युदर कम भएको छ,’ डा। राईले भने । आइतबार र सोमबार अस्पतालमा एक, एक जना संक्रमितको मृत्यु भएको छ ।
केही दिनअघि अस्पतालमा उपचारका लागि आउने बिरामीको संख्या र मृत्यु हुने क्रम निकै बढी थियो । बिरामीको अस्पतालको बरन्डामा राखेरसमेत उपचार भइरहेको थियो । ‘स्थिति नियन्त्रणभन्दा करिब बाहिर गइसकेको अवस्था थियो । सीमित स्वास्थ्यकर्मीले धान्न मुस्किल भइरहेको थियो,’ डा। राईले भने, ‘त्यसैमाथि अक्सिजनको चरम अभाव भइदियो । तर स्थिति अहिले नियन्त्रणतर्फ अघि बढेको छ । अस्पताल टिमको हिम्मतले काम भइरहेको छ ।’
टीकापुर अस्पतालमा सोमबारको कोरोना संक्रमित तथ्यांकअनुसार एचडीयूमा १२ जना, जनरल वार्डमा १६ जना र अब्जरभेसनमा १३ जना बिरामी उपचाररत रहेका जनाइएको छ । पछिल्लो २४ घण्टामा मृत्यु हुनेको संख्या १ जना छ । अस्पतालमा उपचाररत निको भएर डिस्चार्ज ६५ जना भएका छन् । पछिल्लो २४ घण्टामा निको भएर ६ जना डिस्चार्ज भएका अस्पतालले जनाएको छ । हालसम्म अस्पतालमा संक्रमित ३४ जनाको ज्यान गएको छ । – कान्तिपुर (गणेश चौधरी)
