नेकपा (एमाले)का अध्यक्ष केपी शर्मा ओलीले स्थायी कमिटी बैठक बोलाएका छन्।वरिष्ठ नेता माधवकुमार नेपाल पक्षसँगको वार्ता निष्कर्षमा नपुग्दै अध्यक्ष ओलीले स्थायी कमिटी बैठक बोलाएका हुन्। अब आफ्नो ढंगले अगाडि बढ्न स्थायी कमिटी बैठक बोलाएको एक स्थायी कमिटी सदस्यले बताए।
एमाले केन्द्रीय कार्यालय सचिव शेरबहादुर तामाङले आज अपराह्न ३ बजे स्थायी कमिटी बैठक बोलाइएको जानकारी दिए। उनका अनुसार, ललितपुरको च्यासलस्थित तुलसीलाल अमात्य स्मृति प्रतिष्ठानको भवनमा बैठक बस्ने भएको छ।
आजको बैठकका लागि तीन वटा एजेन्डा तय गरिएको स्थायी कमिटी सदस्यहरुलाई जानकारी दिइएको छ। जसमा केन्द्रीय विभागहरुको पूर्णता, विधान महाधिवेशनको तयारी र पार्टी सदस्यता नविकरण तथा वितरण रहेका छन्। आजको बैठकमा यी तीनै एजेन्डामा छलफल हुने जनाएको छ।
१४ साउनमा पार्टी केन्द्रीय कार्यालय पुगेका अध्यक्ष ओलीले नेपाल पक्षसँग सहमति गर्न शनिबारसम्मको समय दिएका थिए। सहमति जुट्न नसकेमा शनिबार स्थायी कमिटी बैठक बोलाएर आफ्नो तरिकाले अघि बढ्ने बताएका थिए।
एमाले दोस्रो तहका नेताहरू छलफलमा जुटिरहेको भए पनि सहमति बन्न सकेको छैन। यसअघि गठन गरेको कार्यदलका सदस्यहरू पनि एमाले एकताका लागि सहमति जुटाउन गृहकार्यमा लागिरहेका छन्।
नेपाल पक्षका केन्द्रीय सदस्य एवं सांसद मेटमणि चौधरीले शुक्रबार काठमाडौंमा आयोजित एक साक्षात्कार कार्यक्रममा अध्यक्ष ओलीलाई सुधार्ने प्रयास गरिँदै आएको भए पनि सुधार्न नसकिएको बताएका थिए। उनले अब नयाँ पार्टी निर्माणमा जुट्ने बताएका थिए।
