कैलाली-धनगढीको माया मेट्रो हस्पिटलले आफ्नै अक्सिजन प्लान्ट निर्माण गर्ने भएको छ । गुणस्तरीय स्वास्थ्य सेवा दिदैं आएको धनगढी चटकपुरमा रहेको माया मेट्रो हस्पिटलले अक्सिजन प्लान्ट जडानका लागि खरिद प्रक्रिया अघि बढाउँदै सम्झौता समेत गरिसकेको छ ।
कोरोना महामारीको समयमा अस्पतालले विरामीहरुको उपचारमा अक्सिजन अभावको समस्या चरम रुपमा झेलेकोले आफ्नै लगानीमा अक्सिजन प्लान्ट निर्माणका लागि खरिद प्रक्रिया अघि बढाउँदै सम्झौता गरेर काम अगाडी बढाईएको हस्पिटलका अध्यक्ष धिरेन्द्र सावदले जानकारी दिए ।
अध्यक्ष सावदका अनुसार हस्पिटलमा अबको २५ दिनमा अक्सिजन प्लान्ट जडान भएर सञ्चालनमा आउनेछ । अक्सिजन प्लान्टको क्षमता प्रति दिन ५० सिलिण्डर रहेको छ । झण्डै ७५ लाखको लगानीमा अक्सिजन प्लान्ट निर्माणको प्रक्रिया अघि बढाईएको छ । माया मेट्रोमा अक्सिजन प्लान्ट जडान भएमा यो अस्पताल आफ्नै अक्सिजन प्लान्ट भएको सुदूरपश्चिमको पहिलो निजि अस्पताल हुनेछ ।
अक्सिजन र शैय्या अभावमा पनि छुट्टै वार्डमा उपचार
धनगढी स्थित माया मेट्रो अस्पताल पछिल्लो कोरोना महामारीको समयमा श्वास प्रश्वास सम्बन्धीका बिरामीहरुले भरिएको छ । कोरोना सम्बन्धी लक्षण भएका बिरामीहरुले अस्पताल भरिएको छ । सरकारले निजी अस्पतालहरुलाई २० प्रतिशत जति कोरोनाका बिरामीहरुको उपचार गर्नुपर्ने भनेपछि निजी अस्पतालहरुले पनि कोभिडका बिरामीको उपचार थालेकोमा माया मेट्रोले त्यसलाई अझ बढी प्राथमिकतामा राखेर सेवा दिदैं आएको छ ।