भरतपुर, १५ मंसिर ।
स्वास्थ्य तथा जनसंख्या मन्त्री भानुभक्त ढकालले सबै स्थानीय पालिकामा अस्पताल स्थापना गरिने बताउनुभएको छ । आज(सोमबार) भरतपुर अस्पतालको आकस्मिक र सरुवा रोग भवनको उद्घाटन कार्यक्रममा बोल्दै मन्त्री ढकालले कोभिड– १९को महामारीमा अस्पताल नभएका सबै पालिकामा निर्माण गर्न लागिएको बताउनुभएको हो ।
“अस्पताल नभएका ६ सय ४९ स्थानीय पालिकामा कोभिड–१९संग लड्नका लागि कम्तिमा पाँच बेड सहितका अस्थायी अस्पताल निर्माण गर्न लागेका छौँ,”मन्त्री ढकालले भन्नुभयो, “त्यसलाई स्थायी गर्दैै अब कुनै पनि पालिकाहरु अस्पताल बिहिन रहने छैनन् भन्ने कुराको सुनिश्चिता गरेका छौँ।” सबै बिरामीको स्वास्थ्य उपचारका लागि सरकार प्रतिबद्ध रहेको उहाँले बताउनुभयो । सबै बिरामीलाई अस्पतालसम्म ल्याउन सकियो भने त्यो नै एउटा क्रान्ति हुने उहाँले दावि गर्नुभयो ।
उहाँले सरकारले स्वास्थ्य सेवालाई गुणस्तरिय बनाउन “पाईलट प्रोजेक्ट”ल्याउन लागेको जानकारी दिनुभयो । “एक चिकित्सक एक स्वास्थ्य संस्था ‘पाईलट प्रोजेक्ट’को रुपमा कार्यक्रम सञ्चालन गर्ने गरि अगाडी बढेका छौँ” उहाँले भन्नुभयो, “बिरामी भएको व्यक्ति घरमा होईन अस्पतालको बेड सम्म ल्याउन हामी प्रयत्नरत छौँ ।” उहाँले सरकारीका चिकित्सकहरुले बाहिर काम गर्दा सेवाका गुणस्तरमा कमी आएको बताउनुभयो ।
कार्यक्रममा बोल्दै मन्त्री ढकालले कोरोना भाइरस नियन्त्रणमा सरकारले उत्कृष्ट काम गरिरहेको बताउनुभयो । “कोरोनासंग यूरोप, अमेरिका लगायतका देशहरु नै घुँडा टेकेको अवस्थामा हाम्रो जस्तो राष्ट्रले दिएको सेवा तुलनात्मक रुपमा उत्कृष्ट हौँ,” उहाँले भन्नुभयो, “तर यतीमा हामी सन्तुष्ट चाँही छैनौँ ।” कोराना भाइरसका विरुद्ध साझा मोर्चा बनाएर अघि बढ्नुपर्ने उहाँको धारणा छ । कोरोनालाई पराजित गर्ने अभियानमा सरकार लागेको भन्दै सरकारले दैनीक ३० हजारसम्म पिसिआर परीक्षण गर्न सक्ने क्षमता विस्तार गरेको बताउनुभयो । तर, परिक्षण गरेर मात्र नियन्त्रण नहुने भन्दै मन्त्री ढकालले अन्य स्वास्थ्य सुरक्षामा ख्याल गर्न आग्रह गर्नुभयो ।
बन्न लागेका कोरोना भाइरसका खोप खरिदका लागि ९ वटा देशसंग परामर्श समेत कुटनीतिक कुरा भैरहेको जानकारी दिनुभयो । कार्यक्रममा उहाँले देशभर बन्न लागेका अस्पतालहरु यो महिना भित्र उद्घाटन भैसक्नुपर्ने बताउनुभयो । नभएमा त्यसठाउँमा अस्पताल बनाउन बजेट विनियोजन गर्न नसकिने स्पष्ट पार्नुभयो । अस्पताल बन्नका लागि पहाडी क्षेत्रमा ९ रोपनी र तराइमा १४ कठ्ठा आवश्यक पर्ने उहाँले बताउनुभयो ।
यसैबिच, भरतपुर अस्पतालको आकस्मिक एवं सरुवा रोग विभागको भवन शिलान्यास गरिएको छ । स्वास्थ्य तथा जनस्वास्थ्य मन्त्री भानुभक्त ढकालले सोमबार(आज)एक कार्यक्रमको अयोजना गरि शिलान्यास गर्नुभएको हो । भरतपुर अस्पतालमा नयाँ बन्न लागेको आकास्मिक कक्ष ५० बेड सहितको अत्याधुनिक भवन बन्दै छ । यसका लागि सरकारबाट ९ करोड बजेट आएको अस्पतालका सूचना अधिकारी लिलाधर पौडेलले जानकारी दिनुभयो । त्यस्तै सरकारको केन्द्रिय कार्यक्रम अन्तरगत सरुवा रोग विभागको भवन निर्माणका लागि ८ करोड बजेट विनियोजन भएको छ ।
सरकारले प्रत्येक प्रदेशमा प्रदेश स्तरिय सरुवा रोग अस्पताल निर्माण उपचार एवम् स्वास्थ्य विपत व्यवस्थापनको लागि बजेट विनियोजन गरेको थियो । तर, वाग्मती प्रदेशको हेटौडा नभई चितवनमा नै बनाउन लागिएको हो । “प्रादेशिक सरुवा रोग अस्पताल निर्माणका लागि ३ सय शैयाको केन्द्रिय र न्यूनतम ५० शैयाको प्रदेश स्तरिय र अत्याधुनिक सुविधा सम्पन्न सरुवा रोग अस्पतालको भवनको उद्घाटन गरेका हौँ,” भरतपुर अस्पतालका अध्यक्ष भोजराज अधिकारीले भन्नुभयो, ‘सरुवा रोगका विभागका लागि भवन, प्रयोगशाला समेत छुट्टै बन्छ ।”
अस्पताल विकास समितिका अध्यक्ष भोजराज अधिकारीको अध्यक्षतामा भएको कार्यक्रममा संघिय सांसद कृष्णभक्त पोखरेल, प्रदेश सांसद विजय सुवेदी, भरतपुर महानगरपालिका प्रमुख रेनु दाहाल, सरुवा रोग विभागका महानिर्देशक डा. गुणराज लोहनी, अस्पतालका पूर्व मेसु कृष्णप्रसाद पौडेल लगायतले बोल्नुभएको थियो ।
