कैलालीको वसन्ता वनमा हुलाकी राजमार्ग विस्तारका लागि रुख कटान सुरु भएको छ । रुख काट्ने कामसँगै निर्माणाधीन राजमार्गको कामले गति लिने भएको छ ।
वनको कानुनी अड्चनका कारण दुई किलोमिटर खण्डमा हुलाकी राजमार्गको काम रोकिएको थियो । दस दिनसम्म रुख काट्ने काम सम्पन्न गरेर राजमार्ग निर्माण अघि बढाइने हुलाकी राजमार्ग आयोजनाका इञ्जिनियर पदम मडैले बताए ।
वसन्ता वन क्षेत्रमा पर्ने १८ किलोमिटरमध्ये १६ किलोमिटर सडक खण्डमा कालोपत्रे गर्ने काम सम्पन्न भइसकेको आयोजना कार्यालयले जनाएको छ ।
कैलारी गाउँपालिकाको बैजपुरदेखि वसन्ता सबडिभिजन वन कार्यालयसम्म बाँकी रहेको दुई किलोमिटरमा राजमार्ग विस्तारका लागि रुख कटान कार्य अगाडि बढाइएपछि आयोजनाको काम अघि बढेको हो ।
गत फागुनको मन्त्रिपरिषद् बैठकले रुख कटानको आदेश दिने निर्णय गरेको दुई महिनापछि रुख हटाउने काम अगाडि बढेको छ । सो खण्डमा १०० वटा रुख हटाउन आवश्यक रहेको आयोजना कार्यालयको भनाइ छ ।
सो खण्डको ठेक्का अवधि जेठ मसान्तसम्म रहेको छ भने तुन्डी, प्रेरा, चन्द्रा एण्ड वसन्ता जेभीले निर्माणको ठेक्का पाएको छ । आयोजनाको ठेक्का २०७३ मा भएको थियो ।
